wacan basa jawa

Contoh maca nyaring

Asal mulane Kutha surabaya

Jaman biyen ing segara antarane jawa lan madura, iwak yu ( sura karo baya, tukaran terus rebutan wilayah kanggo golek pangan. Loro – lorone pada kuwate, trampile lan julige. Nganti sawijining dina ana perjanjian: iwak sura wilayahe ing segara, baya wilayahe ing dharatan.wiwite wektu iku, ora ana maneh tukaran, nanging suwe- suwe sura nglanggar perjanjian, sheweke golek pangan nang kali – kali adoh saka segara. Bab iki nggawe nesune baya. Banjur loro – lorone padha perang maneh, perange malah luwih seru lan dahsyat. Sajrone perang tandhing baya dicakot sura ing pacake buntut sisih tengah. Iwak sura dicakot baya buntute nganti meh pedhot. Sura banjur mlayu menyang segara. Baya seneng atine, bisa ngrebut wilayahe maneh. Tarung antarane sura lan baya mau banget negsemake. Mula kanggo ngeling – ngeling prastawa iku, dhaerah iku dijenengake SURABAYA, dijupuk saka iwak sura la baya, banjur gambare tarunge sura lan baya didadekake kutha surabaya.

Conto maca Ekstensif

Cenil, Panganan Murah Lan Ngangeni

Masyarakat Jawa mesthi wae wis ora pangling maneh karo panganan sing jenenge cenil. Panganan nyamikan utawa camilan iki uga klebu panganan tradhisional. Panganan iki uga wis akeh tinemu ing pasar swalayan.

Cenil utawa cethil yaiku  panganan kang digawe saka saripathine pohung utawa tela kaspe. Panganan iki sejatine wis dikenal dening masyarakat puluhan tun kepungkur. Anehe, tembung cenil lan cethil ing kamus bausastra Jawa nduweni teges kang beda. Cenil ateges samubarang apa wae kang wujude bunder , cilik , sarta empuk mendal. Dene cethil aateges keladuk gemi aliyas medhit

Meh saben pasar tradhisional ana wong adol cenil. Biyasane para bakul panganan iki adole ing wayah esuk nganti tekan awan. Dene saperangan kang adole ing wayah esuk nganti tekan awan utawa sore, bareng karo para bakul grobagan. Para bakul grobakan iki padha dhasar panganan cenil, bareng karo panganan klepon kang digawe saka glepung ketan.

Panganan cenil klebu panganan kang ora awet, amarga pancen ora nganggo bahan pengawet kayata borak utawa formalin. Dadi pancen panganan alami lan natural. Mula kerep didol nalika isih esuk nalika barange isih anget. Sejatine panganan iki rasane anyep tanpa rasa. Mulane supaya ana rasane, adate para bakul nambahi parutan klapa lan gula pasir sing lembut. Kadhang gula pasir diganti gula jawa. Yen dipangan nganggo campuran mau rasane dadi gurih lan legi, ndadekake enak dipangan. Kang khas saka panganan iki yaiku nalika dipangan krasa makcenil-cenil amerga pancen empuk rada mendal-mendal.

Maca Kritis

JEMBATAN SURAMADU, KUDUNE LEGI

Sura ateges wani, utawa kendel, bisa uga ategese pahlawan. Madu ategese legi. Jembatan Suramadu kudune rasane bisa wani luwih legi tinimbang madu. Jembatan kang paling dawa ing Asia Tenggara iki nyambung antarane pulo Jawa lan pulo Madura. Dawane ora kurang saka 5km. Diarani Jembatan Suramadu awit nyambung antarane Surabaya lan Madura, banjur dicekak kanthi Suramadu. Dadi Suramadu iku Surabaya-Madura

Blegere tretek utwa Jembatan Suramadu mula katon pengkuh, endah negnsemake. Menawa wayah bengi sesawangane ngelam-elami ati. Awit lampu-lampu jembatan katon paling krelip endah warna-warni. Kiwa tengene banyu segara angombak saya gawe laam-laming ati. Mung emane, jembatan kang dibangun watara 10 tahun iki akeh ninggalake crita memelas. Hla kepriye, lagi wae rampung diresmikake presiden SBY Baut – baute padha ilang. Malah uga ana kang wayah lingsir wengi nyoba nyopoti wesi –wesi sangisore jembatan nggawe las. Ora nggenah tenan. Wong tujuwane jembatan suramadu iki kanggo kapentingan sing luwih jembar hla malah kok diganggu gawe mung karana nguber butuhe dhewe. Kajaba iku, ing bab keamanan isih keprungu warta kurang maremake. Isih ana kang ngadhang dalan njaluk meksa, ana kasus penculikan polisi ing lingkungan Suramadu, Isp. Ana maneh bab kebersihan, sakiwa tengene jembatan uga perlu ditata maneh supaya luwih resik gemrining. Dadi kang mrasanja dadi seneng atine, marem rasa jiwane. La yen pembangunane iku ana pro kontra ya wis mesthi ana. Ana ing sing setuju, ana sing ora, hla ya mesthi lumrah. Nanging rak ya kudu mikir adoh lan jembar. Kapentingan umum kudune luwih ditengenake.

Jembatan iki kajaba minangka sarana perhubungan, saiki uga minangka sarana rekreasi. Akeh para wisnu lan wisman kang nyoba liwat jembatan suramadu. E, ya kok nggleser kepenak, senajan tarif tol-e ya rada krasa. Nanging, yen tinndhing karo wragad mbangun, tarif tol samono mau ya jan isih adoh ngangut.

          Mbangun iki kapetung angel, luwih agel maneh ngopeni asile pembangunan mau. Mulo ayo, saiki Suramadu mau dijaga supaya awet lestari, kareban bisa kanggo sarana perhubungan ekonomi, sosial, budaya, hankam, politik. Lan minangka sarana wisata. Suramadu mula isih butuh diwedhaki, dilipstiki, diwenehi lotion supaya luwih ayu lan luwih ndemenake lan banjur bisa dideleng generasi mbesuk yen embuh buyute nduwe tinggalan pembangunan sing peng -pengan